雷達部屋論壇 - 香港討論區 ! 電台資訊的論壇

標題: 廣州華X賓館 [打印本頁]

作者: 柯仔 時間: 2006-1-21 21:20 標題: 廣州華X賓館

廣州華X賓館

呢單o野係我朋友個家姐（寶儀）o既親身經歷。由於寶儀成日都要返大陸公幹，所以會o係大陸一o的城市長期Book定一間酒店房住。今年３月寶儀姐又要同兩個同事上廣州傾生意，佢o地都係住一直住開o個間華X賓館，不過因為多o左兩個同事上去，所以就租多o左一間房，奇怪事就發生o係呢間房o勒！

寶儀姐同o個兩個同事間房都o係同一層，不過就各自o係電梯o既另一邊，大家講好菍一陣就o係撐口等。不過當寶儀姐行出房門時，竟然見到一o的好恐怖o既o野。

原來當寶儀姐準備行過去另一間房時，咁o岩佢其中一個同事已經行o左出o黎，而另一個同事亦由房行緊出o黎。咁樣本來好正常，不過當寶儀姐想叫佢個同事時，竟然見到有一個半透明物體穿過行緊出o黎o個位同事o既身體，飄出走廊。

據寶儀姐講，o個個半透明o既物體應該係一個女人，留住一把到膊頭o既長髮，著住一套普通便服，面色白到灰。o個個女人o係衝o左出o黎之後，就向住寶儀姐o個邊繼續衝。寶儀姐話自己曾經同呢個「女人」對望，覺得係女人o既目光好凶，好似要同佢講「唔好阻住我！好想離開呢度！」咁，所以寶儀姐就好自然咁側一側身畀佢過。但係個「女人」依然衝過佢o既身體，o個種感覺就好似畀一樣o野穿過自己一樣，好「毛管棟」。

後尾寶儀姐問佢o個o的同事有冇見到o野？佢o的同事話乜都冇見過，不過一入到房就覺得間房好古怪。好似電掣明明都未開，但係個電視就突然自己著o左，仲自動轉台；熄o左佢又自動開返。連最尾諗住拿拿臨走人，熄o左間房個大掣之後，個電視機都自動著返，所以佢o地先至咁快出o黎。而出o黎之後，行後尾o個位同事更話自己突然間覺得一陣寒意透過自己，但係跟住就冇事。

由於大家越諗越驚，所以索性搬埋去寶儀姐間房一齊住，而且以後都唔再Book呢間酒店住。

歡迎光臨雷達部屋論壇 - 香港討論區 ! 電台資訊的論壇 (http://bbs.lritat.com/)